أصدر المخرج محمد خضر زوج ياسمين أبو النجا ابنة الفنانة نجلاء فتحي توضيحا للرد على عدة استفسارات أولها عن سبب حمله حذاء زوجته وهل كان الهدف الاستعراض وخطف الأنظار، والثاني عن سر حضوره مهرجان الجونة رغم إعلانه سابقا عن وجود خصومة بينه وبين إدارته بعدما استولوا على فكرته وأنكروا حقوقه المادية والأدبية.
خضر نشر التوضيح عبر حسابه بموقع الفيس بوك تحت عنوان "توضيح لمن يهمه الأمر، وقال:عندي بس تعليقين صغيرين عايز اقولهم لمن يهمه الامر، أولا بالنسبة للصورة بتاعتي انا ومراتي، الصورة ديه اتاخدت واحنا مروحين الساعة ١:٣٠ صباحاً من حفل الافتتاح (مش وإحنا داخلين حفل الافتتاح) اكيد مش هدخل حفلة شايل جزمة مراتي وماشي!
عندي بس تعليقين صغيرين عايز اقولهم لمن يهمه الامر: ١- بالنسبة للصورة بتاعتي انا ومراتي، الصورة ديه اتاخدت واحنا مروحين...
تم النشر بواسطة Kheidr Mohamed Kheidr في الثلاثاء، ٢٧ أكتوبر ٢٠٢٠
تابع قائلا: إحنا الدعوات بتاعتنا دعوات VIP مش دعوات مشاهير، فده اصلاً ما بيدخلناش على السجادة الحمراء مع الفنانين، ده بيدخلنا من باب تاني جنبه ما فيهوش كاميرات، كل ما هناك ان بعد ٦ ساعات من الحفل، واحنا خارجين باب الخروج كان زحمة وكل الناس خارجه منه (فنانين وغير فنانين ومصورين وكاميرات فيديو).. ومراتي اكيد بعد ٦ ساعات رجلها تعبت زي اي واحدة رجلها بتتعب في اي فرح.. فقلعت الجزمة! فمن الطبيعي ومن الرجولة ومن الأدب ان انا اللي انزل اجيب الجزمة (مش هخلي مراتي توطي وسط الناس اكيد.. ) وديه لا حاجة تعيبني ولا تقلل مني.. واحدة شايلة بيتي على راسها ١٥ سنة مش هاشيلها جزمتها ١٥ دقيقة؟
أضاف: المهم ضربت بعيني لقيت ممر السجادة الحمرا مفتوح وفاضي قولت لها ياللا نخرج من هنا أسرع، ولقينا المصور العزيز محمد حامد بيطلب مننا صورة فوقفنا ٣ ثواني بالظبط .. ابتسمنا واخدنا الصورة وخلعنا .. والراجل تفضل مشكوراً وبعت لي الصورة على الفيسبوك وبصراحة الصورة لذيذة.. ولما حطيتها عندي على الوول لقيتها بيتعمل لها شير روحت قافلها (للاصدقاء فقط) بس كدة.
وحول سبب حضوره مهرجان الجونة رغم وجود دعوات قضائية متبادلة بينه وبين إدارته قال خضر: الناس اللي بتسأل انا ازاي في المهرجان بعد المشاكل (انا بفضل ربِنَا وبفضل دعواتكم) اعلنا السنة اللي فاتت والجرايد كتبت وانا كتبت واحد المنظمين طلعت في التلفزيون وقالت عملنا عقد تصالح مع محمد خضر خلاص واخد حقوقه وبقى ضيف شرف المهرجان كل سنة والسنة ديه اسمها سنة الصلح خير.. وديه تاني سنة ليا في المهرجان كا ضيف شرف انا ومراتي.. وشكرت عندي عالفيسبوك كل الناس اللي وقفوا جنبي وتمنياتي بالتوفيق لمهرجان الجونة.
وحول الاستفسارات التي وصلته لشرح تفاصيل التصالح قال: (تفاصيل عقود التصالح) اللي بيفهم في القانون او يعرف حد بيفهم في القانون يسأله وهايقوله ان تفاصيل اي عقد تصالح بتبقى سرية للغاية وبيحظر النشر او الادلاء بها والا يطبق شروط جزائية ومبالغ طائلة على من يخالف ذلك.. انما اللي مفهوم من الصورة الكبيرة اني اخدت حقوقي خلاص و كمان بقيت ضيف شرف في المهرجان كل سنة وبالمناسبة المهرجان لذيذ قوي السنة ديه وفيه افلام جامدة جداً وندوات اجمد واجمد ياللا اشوفكم لما نرجع ان شاء الله حضن كبير وبوسة كبيرة ليكم كلكم.
لمشاهدة أجمل صور المشاهير زوروا أنستغرام سيدتي
