كشف الفنان أمير صلاح الدين عن الجانب المأساوي في حياة نجوم الصف الثاني، الذين شاركوا بموسم المسلسلات المصرية لرمضان 2021، مؤكدا تعرض لعملية نصب في 4 مسلسلات ولم يأخذ مستحقاته المالية.
أمير أكد تخوف عدد كبير من النجوم من الحديث عن المأساة التي حدثت هذا العام، وأشار إلى أن الوقائع التي سيسردها هي مجرد "بيان أول" ستتبعه بيانات أخرى، وأضاف عبر حسابه الشخصي بموقع الفيس بوك: بيان صحفي والأرزاق على الله، مسلسل رقم 1.. مضيت العقد بنصف أجري.. و ماخدتش دفعة تعاقد.. ! ذاكرت كل الحلقات اللي معايا، وبعد 3 شهور .. دوري كله اتشال - لأسباب واهية.. تدين المؤلف و المخرج و المنتج الفني.. و طبعًا البطل.
#بيان_صحفي و الأرزاق على الله.. - مسلسل رقم ١ .. مضيت العقد بنصف أجري .. و ماخدتش دفعة تعاقد .. ! ذاكرت كل الحلقات...
تم النشر بواسطة Amir Salaheldeen في الاثنين، ١٩ أبريل ٢٠٢١
وتابع: مسلسل رقم 2 - اعتذرت عنه 3 مرات متتالية بسبب ضعف المقابل المادي، عدم اكتمال السيناريو ولا ملامح الشخصية، وافقت بعد وساطات من بعض الأصدقاء- برضه بنص أجري- صورت في ظروف قاسية (نهار وليل خارجي - صيف - شتاء - بلبس فرعوني شبه عاري)، و لكن مش مهم هذه هي متاعب المهنة.. قبل عرض المسلسل بأسبوعين، تم إيقافه ووقف مستحقات العاملين بقرار من فوق - مش عارف يعني إيه من فوق.
وأضاف أمير: مسلسل رقم 3 (شركة إنتاج تانية)- كلمني المخرج الشاب على شخصية صغيرة -وافقت- استغرب المخرج إني وافقت رغم صغر حجم الدور.. و بعد تقريبًا شهر، جابوا واحد تاني.. بدون علمي.. ولا المخرج الشاب المتحمس ولا المنتج الفني الكبير اعتذر".
وواصل قائلًا: مسلسل رقم 4 .. بعد فترة انقطاع رجعت اشتغل تاني مع مخرجي وممثلي المفضلين .. لكن شرط غريب جداً.. لأن المسلسل بقى 15 حلقة مش 30، فأنا برضه هاخد نص أجري لأنه عدد أيام تصوير أقل، واللي حصل غير كده خالص .. عدد الأيام زي أيام الـ30 حلقة و أكتر.
واختتم أمير صلاح الدين بيانه قائلًا: ملحوظة: مش مسموح للممثلين الاحتفاظ بنسخة من العقد.. وده مخالف لأعراف المهنة، الخلاصة: أنا اتنصب عليا السنة دي .. آخذ حقي من مين؟!!! الناس خايفة تتكلم بس أنا مش هاسكت.. المنظومة فاسدة ولازم تنضف وبسرعة.. أخركم معايا رمضان 2021.
المثير أن الفنانة عارفة عبد الرسول وصفت ما حدث لزميلها بالحسد وعلقت على بيانه قائلة: انا متابعه معاك كل ده وبادعيلك والله ان الازمه دى تعدى ولولا انى مش باعتقد فى الحسد كنت قولت انت اتنشيت عين جامده.
وحاول الفنان أحمد حداد مواساة أمير مؤكدا أن وضعه أفضل من عدد كبير من نجوم الفن لا يجدوا أية فرصة للعمل، وقال: والله ممكن ردي يكون سخيف بس للأسف احنا دلوقتي بنتوقع الأسوأ و نص الاجر ده عند ناس مفيش اجر و عند آخرين مفيش شغل للأسف
مش هاين اقولك انك أحسن من غيرك وسط غضبك بس شوف الظلم التاني لفنانين آخرين و اعرف ان اللي طالك احسن من غيرك وربنا كبير.
لمشاهدة أجمل صور المشاهير زوروا أنستغرام سيدتي
