ردت الفنانة سارة التونسي، على تصريحات المنتج جمال العدل حول أسباب استبعادها من مشاركة النجمة يسرا بطولة مسلسل "حرب أهلية"، واستبدال الفنانة أروى جودة، وكشفت سارة عن انتصارها على جمال العدل في ساحات القضاء، وأكدت تحقيقها العديد من النجاحات منذ عودتها لممارسة التمثيل في بلدها تونس، وقالت إنها ستعود إلى مصر متى أرادت ذلك.
سارة التونسي أعادت نشر مقطع فيديو تضمن تصريحات صادمة من المنتج جمال العدل خلال حواره مع برنامج "حبر سري" عن كواليس استبعادها من بطولة مسلسل "حرب أهلية" رغم تصويرها أغلب مشاهد العمل، واستدعاء الفنانة أروى جودة لإعادة التصوير، وعلقت عليها عبر حسابها الشخصي على موقع الفيس بوك، برسالة مليئة بالسخرية رداً على تلميح العدل بأنه لا يتذكر اسمها.
سارة التونسي: ربحت القضية ضد العدل جروب
وكتبت سارة التونسي: "أستاذ جمال العدل أنا ماكنتش عارفه إني مضايقة حضرتك أوي كده، خصوصاً بعد ما أنا كسبت القضية ضد شركة العدل جروب وحضرتك خسرت قضيتك ضدي".
وأضافت: "بس ياااااه أنت لسه فاكر؟ ده عدى على الموضوع ده أكتر من سنتين وأنا والله نسيت الموضوع (بس دي «والله» بجد مش زي بتاعتك) ،واشتغلت في بلدي وكسّرت الدنيا ولو عايزة اشتغل في مصر هاشتغل، أصل مصر دي كبيرة أوي يعني أكبر من حضرتك ومن أي حد، ولا إيه يا أستاذ جمال؟ مش انت إسمك كده برضه؟".
وتابعت: "والله عيب على سنّك وتاريخك كمية الكذب اللي انت كاذبها بخصوصي في اللقاء ده (بس مش تاريخك كله يعني)، وكمان حركة إنك نسيت الاسم دي تقلّل منك مش مني، بلاش أقولك شكلك كان عامل ازاي وانت بتحلف إنك نسيت الاسم، عملتها قبل كده في إعلام بلدي تونس واترد عليك رد عظيم من المذيعة التونسية اللي كانت بتحاور حضرتك".
سارة التونسي: لم أغادر مصر ولكن اخترت التركيز في تونس
واستكملت: "وعلى فكرة أنا مطلعتش برة مصر! أنا عندي بيت في مصر بزوره كل شهر تقريباً وبختار أشتغل إيه وماشتغلش إيه وأنا اخترت أركز في تونس وعملت بطولة مسلسل تونسي كسّر الدنيا السنة اللي فاتت والإعلام العربي كلّه اتكلّم عنه، ويمكن عشان كده حضرتك افتكرتني تاني فجأة (ده لو كنت أصلاً عرفت تنسى الدّرس) وإن شاء الله هيكسّر الدنيا في الجزء التاني السنة دي".
سارة التونسي: رفضت التوقيع على عقود بطولة لـ 3 سنوات
وواصلت: "أنا أكبر من إني اشتغل أي عمل وخلاص عشان بس أقول أنا موجودة، وده من زمان وانت عارف ده كويس واتكلمنا فيه لمّا حضرتك طلبت تقابلني في مكتبك عشان كنت عايز تمضي معايا عقد بـ٣ سنين بعد ما نجحت في دور شيرين في مسلسل بـ١٠٠ وش بأمارة ما قلتلي أنا محتاج روح جديدة ودم جديد عشان اللي عندي في الشركة كبروا خلاص وقلت كلام تاني كتير عنهم في غيابهم.. ولا نسيت دي كمان؟ ويومها أنا قلت لنفسي اللي يتكلم كده عن ناس اشتغلوا معاه سنين، يخوّف ورفضت أمضي مع حضرتك العقد ده يا أستاذ يا اللي ناسي اسمي.
سارة التونسي: عندي كلام كثير وخطير
وتابعت سارة التونسي: أنا عندي كلام كتير وخطير ممكن أقوله بخصوص حضرتك وبخصوص اللي انت قلته في برنامج حبر سري، بس للأسف عندي تصوير ومش فاضية، وكمان حزني على اللي بيحصل في العالم مخليني مستهيفة كل الحاجات دي".
واختتمت: "حضرتك ولا اتعظت من عقاب ربنا وقتها بإن كل استديوهات ومخازن العدل جروب اتحرقت ولا اتعظت من إنك خسرت القضية وأنا اللي كسبت الحمد لله ولا اتعظت من اللي بيحصل الأيام دي.. مش عارفة أقولك إيه والله وبصراحة ولا عندي وقت أقول أصلاً، كفاية عليك المشاكل اللي حضرتك عاملها مع نص ممثلين مصر".
تفاصيل الأزمة بين جمال العدل وسارة التونسي
واشتعلت من جديد الأزمة، بين المنتج جمال العدل وبين سارة التونسي، بعدما تحدث عنها العدل مدعياً أنه لا يتذكر اسمها، ثم سرد عدة تفاصيل عن أسباب "طردها" من مسلسل حرب أهلية، تعد مسيئة لسمعة أي فنان، حيث قال العدل: دي ضايقتنا في التصوير جداً، أنا ويسرا والمخرج، وكنا مش فاهمين عايزة إيه، ومشيتها وعدنا كل تصويرها، بعد ما اشتغلت معانا في مسلسل بـ 100 وش وكانت شاطرة جداً، وكانت حلوة وملكة جمال، وبعدها قررت أقدمها في دور مهم جداً مع يسرا في السنة التالية، وقلت لها أنا أقدمك كبطلة، لكن لو عدوتنا متعملش معانا اللي عملته.
وأضاف جمال العدل: تأخير بالأربع ساعات، وتيجي التصوير مش حافظة، وآخر حاجة اتخانقت مع باسل خياط وأنا جن جنوني، وبدأت تبقى بايخة مع زمايلها، قلت لها اعتبريني منتج دمه تقيل وشركتنا بايخة، ويسرا مش لطيفة، واستحملينا لنهاية المسلسل ولما نطلبك مرة ثانية ماتشتغليش، قالت عندك حق وثاني يوم لم تحضر، وابتدوا الناس يكلموني من تونس، وجبت مكانها أروى جودة اللي أحسن منها 10 مرات عملت المسلسل وأنقذت الموقف.
لمشاهدة أجمل صور المشاهير زوروا «إنستغرام سيدتي»
وللاطلاع على فيديوجراف المشاهير زوروا «تيك توك سيدتي»
ويمكنكم متابعة آخر أخبار النجوم عبر «تويتر» «سيدتي فن»
