تصدى المخرج هادي الباجوري للانتقادات الموجهة إلى الفنانة الشابة داليا شوقي، والنجم باسم سمرة بطليْ مسلسله الأخير "سفاح الجيزة"، وأكد أنه الوحيد الذي يتحمل المسؤولية، لافتاً إلى أن كل ما حدث في العمل "من اختياره"، وأشار إلى أن الجمهور يفضل مشاهدة "القوالب الجاهزة"، وعندما يتم تقديم عمل مختلف يرفضه في البداية، ولكن مع مرور الوقت يتقبل هذا الاختلاف، وأكد الباجوري عن وجود خطة لتقديم جزء جديد من العمل بعد نجاحه.
هادي رفض حملة السخرية من اختيار باسم سمرة لتقديم شخصية الضابط، وقال في لقائه ببرنامج "تفاعلكم": الجمهور بيحب يتفرج على اللي اتعود عليه، ولما بتدي له حاجة جديدة بياخد فترة علشان يتعود عليه، ليه باسم سمرة ميبقاش ظابط؟ علشان كان بيعمل أدوار بلطجي؟ وده مالوش دعوة بالموضوع والظابط في مصر اتعودنا عليه في المسلسلات إنه يكون له شكل معين زي أمير كرارة.
هادي الباجوري: باسم سمرة ممثل شاطر جداً
وتابع: أنا بحب أخرج عن المألوف، وباسم سمرة ممثل شاطر جداً وفي البداية الجمهور كان مخطوف منه وبعد فترة شافوه بيعمل الدور مظبوط، وأنا شايف إنه ممثل شاطر جداً أي دور هنديهوله هيعمله مظبوط.
ورد هادي الباجوري على الانتقادات الموجهة إلى الفنانة الشابة داليا شوقي قائلاً: الجمهور بتاعنا بيبقى ماسك كورباج شوية، يعنى داليا في أول 4 حلقات كانوا الناس طايرين بيها وشايلينها على دماغهم من فوق، ولما عملت مشهد حسوا إنها بالغت فيه مسكوا لها كورباج وسكاكين ودبحوها، مع إن إنت لو اكتشفتي إن جوزك اللي متجوزاه بقالك 4 سنين قاتل 9 وكمان خطف أختك وبيحبها، رد فعلك ممكن يكون أي حاجة.
هادي الباجوري: السوشيال ميديا تتربص بالنجوم
وتابع: إحنا السوشيال ميديا عندنا بقت مبالغة وقاعدين للناس على الواحدة، ولو البنت بالغت شوية في المشهد فأنا اللي مسؤول عن ده وأنا اللي كان ممكن أقولها تهدى، وأنا كنت مقتنع بأدائها وأنا شايف إنها ممثلة شاطرة ومش هطلع أقول ده على السوشيال ميديا، وأنا آسف إني هقول ده ولكن الناس بقت تقول رأيها بشكل عنيف.
أضاف: أنا مبتأثرش أوي بآراء السوشيال ميديا، سواء كانت بالمدح أو لأ ومش بتابعها أوي، وأنا بقيم العمل من وجهة نظري أنا مبسوط منه واللا لأ أو فيه عيوب وببقى عارف من الأول إن ده اللي أنا راضي بيه، ومفيش عمل مفيش فيه آراء مختلفة ومقدرش أسأل الناس إنتوا كنتوا عايزينه ينتهي إزاي، ودي حاجة موجودة طول الوقت وفكرة إن يكون في آراء مختلفة دي حاجة صحية للعمل، ومستحيل نرضي كل الناس.
تفاصيل تحضير أحمد فهمي لشخصية السفاح
وعن تفاصيل تحضيراته مع الفنان أحمد فهمي بطل مسلسل "سفاح الجيزة"، فعلق هادي الباجوري، قائلًا: أنا بحب أحضر كويس أوي مع الممثلين في الأول، وعملنا بروفة ترابيزة وقراءة عادية وبنقترح تفاصيل معينة، واتفقنا على الابتسامة وطريقة الكلام وتون الصوت وحركة الجسم والنظرة، دي كلها تفاصيل بتطلع لما تقرأ مع الممثل ودي بتبقى المفتاح، وساعات وقت التصوير بتفلت منه وبنرجعه.
كما تحدث هادي الباجوري، عن وجهة نظره في عدم مد حلقات مسلسل "سفاح الجيزة" عن 8 حلقات، قائلًا: وجهة نظري إن الموضوع يكون في أحداث طول الوقت ومتلحقش تتنفس، وعايز الجمهور يفكر معايا مش كل حاجة بالمعلقة، ولو إحنا بنتكلم على الراجل اللي مستوحى منه القصة هو بالفعل قتل 4، إحنا خليناه خطف كمان في المسلسل وده الدراما اللي بنزودها، ولو أكتر من 8 حلقات بالنسبة ليا هيبقى فيه ملل في العمل.
وحول احتمال تقديم أجزاء جديدة من "سفاح الجيزة" قال هادي الباجوري: إحنا لسه مش محددين في جزء ثاني أو ثالث ودي حاجة ليها علاقة بشركة الإنتاج أكتر مني، لأن ممكن يكون في جزء ثاني ومكنش أنا المخرج بتاعه مش لازم كل الأجزاء أكون أنا المخرج بتاعها، ولكن شركة الإنتاج هي اللي بتحدد، واللي أنا عارفه إن فيه خطة يكون في جزء ثاني.
وأكد المخرج هادي الباجوري إنه من المحتمل أن يعتذر عن إخراج الجزء الثاني من مسلسل "سفاح الجيزة" في حال عدم تقديم فكرة جديدة بالعمل، قائلًا: أنا دايمًا لما بحب أعمل حاجة يكون عندي تحدي بعمله، والجزء اللي الناس شافته أنا كمخرج معملتش النوعية دي قبل كده، والجزء الثاني لو اتعرض عليا لو ملقتش فيه الحاجة اللي تخليني أعمل حاجة جديدة ممكن أعتذر.
من هو سفاح الجيزة؟
اسمه قذافي فراج عبد العاطي عبد الغني، مواليد محافظة الجيزة، سقط بين أيدي الأجهزة الأمنية عام 2020 بعد 5 سنوات من ارتكابه جرائم إزهاق الروح والنصب والاحتيال، وكانت حصيلة تلك الجرائم 4 ضحايا، وهم: صديقه المقرب المهندس رضا وزوجته فاطمة ونادين شقيقة زوجته وزوجة أخرى، وكانت تلك الجرائم في محافظتي الجيزة والإسكندرية، ولم يكتف بجرائم إنهاء الحياة فقط، بل كان ينتحل صفة ضحاياه وأشخاص آخرين.
أبطال مسلسل سفاح الجيزة
شارك في مسلسل "سفاح الجيزة" عدد كبير من الفنانين، ومنهم: أحمد فهمي، ركين سعد، صلاح عبد الله، باسم سمرة، داليا شوقي، جيهان الشماشرجي، وعدد آخر من الفنانين، والمسلسل من تأليف محمد صلاح العزب، وإخراج هادي الباجوري.
لمشاهدة أجمل صور المشاهير زوروا «إنستغرام سيدتي».
وللاطلاع على فيديوغراف المشاهير زوروا «تيك توك سيدتي».
ويمكنكم متابعة آخر أخبار النجوم عبر «تويتر» «سيدتي فن».
