طليق ياسمين أبو النجا يثير الجدل: ممكن أقول سبب طلاقنا الإجباري لكن بشرط

ياسمين أبوالنجا وابنتها وزوجها السابق- الصورة من حسابه على فيسبوك

أثار المخرج خضر محمد خضر، طليق الراحلة ياسمين أبو النجا، ابنة الفنانة نجلاء فتحي، جدلاً واسعاً خلال الساعات القليلة الماضية، بعدما ألمح إلى انفصاله إجبارياً عنها قبل عامٍ ونصف العام تقريباً. وذلك بعد الانتقادات التي طالته مؤخراً، ووصلت إلى حد اتهامه بالتخلّي عنها في مرضها، وزواجه بأخرى.

الطبيب حذرها من الحمل مرة ثانية

وكتب خضر محمد خضر عبْر حسابه على "فيسبوك"؛ قائلاً: "على فكرة، أنا بعرف أرد كويس وبعرف أحكي كويس. يعني أنا مستعد أحكي لكم عادي عن أسرار بيوتنا اللي ما حدش يعرفها غير المقربين مننا. وممكن أحكي لكم عن علاقتي الزوجية أنا وياسمين أبو النجا من بعد ما خلفنا ومن ساعة ما دكاترة فرنسا حذرونا من الحمل مرة تانية. وممكن أحكي لكم عن بداية النهاية من سبتمبر 2024 بعد 18 سنة جواز".

انفصلت عن ياسمين أبو النجا بالعافية

وتابع: "ممكن أحكي لكم مين أجبرني أنا وياسمين على الطلاق بالعافية، وإيه السبب، وليه ياسمين معرفتش تقف قدام القوة القهرية دي. وممكن أحكي لكم مين أجبرها تسيب البيت 4 أشهر ومترجعش غير لما نتطلق، وبقيت أنا عايش لوحدي 4 أشهر في بيتنا، وبنتي عايشة 4 أشهر مع أمي، وهي عايشة 4 أشهر إجباري في بيت تالت".

قوة قهرية وقفت أمام عودتي لها

واستكمل طليق ياسمين أبو النجا؛ قائلاً: "ممكن أحكي لكم أنا وياسمين كنا بنتقابل في الشارع اللي ورا بيتهم في السر إزاي عشان ترجع البيت، وفشلنا برضو بسبب القوة القهرية دي. وممكن أحكي لكم عن صداقتي أنا وياسمين وعلاقتنا بعد الطلاق لما رجعت بيتنا وأنا مشيت وقعدت جنب أمي عشان كانت بتتعالج من السرطان. وممكن أحكي لكم عن مكالماتنا أنا وياسمين ورسايلنا كل يوم وزياراتنا كل أسبوع. وممكن أحكي لكم أنا ليه اتجوزت بعد الانفصال بـ13 شهر وعملت فرح بالرغم إن مراتي ماكانش فارق معاها نعمل فرح. وياسمين كانت على علم، وزين حضرت الفرح من دون أيّ مشاكل أو نفسيات".

وأعرب عن استيائه الشديد من الانتقادات التي طالت زوجته الحالية؛ قائلاً: "مراتي اللي إنتو نازلين فيها تجريح وتقطيع من دون ذنب. زي ما نزلتو تجريح في ياسمين من دون ذنب لما طلعت معايا في مهرجان الجونة، وسخرتو منها عشان ماكانش عاجبكم شكلها واتريقتو عليها ودمرتو لها نفسيتها لمجرد إنها مش شبه أمها. لدرجة إنها حلفت ما تطلعش في مهرجانات تاني من ساعتها. ولا نسيتو؟ كومنتاتكم وجرحكم ليها وسخريتكم منها وألفاظكم النبيلة لسه موجودة على فيسبوك على فكرة".

واستطرد قائلاً: "ممكن أحكي لكم مين اللي ضحك على ياسمين ووالدتها وأقنعهم إنها تعمل قسطرة تكميلية في المستشفى بتاعتها. بدل الجراحة التكميلية اللي الدكتور الأسباني رفض يعملها عشان ما يحصلش مضاعفات واحتمال وفاة. وحذرها من القسطرة وأنا وزين حذرناها وللأسف عملتها من ورا ضهرنا. وممكن أحكي لكم على كل حاجة كل اللي نفسكم تعرفوه".

ياسمين كانت بمثابة شقيقتي الثانية وليست طليقتي

وتابع: "أحكي لكم بس بشرط. كل واحد فيكم يحكي لنا الأول عن أسرار بيته والخبايا اللي ما حدش ينفع يعرفها وعلاقتكم كأسرة وعلاقتكم كأزواج ومين عمل إيه بالتفصيل. ومين راح فين وعلاقتكم الصحية ومشاكلكم النفسية وأسماء الدكاترة اللي بيعالجوكم والأدوية اللي بتاخدوها، ومين طلق مين وليه، ومين اتجوز مين وليه وامتى. اللي مستعد يحكي أسرار بيته بالتفصيل على الملأ أنا هحكي له أسرار بيوتنا بالتفصيل. يا إما خليكم في حالكم وسيبو الناس في حالها".

وقال: "من يوم طلاقنا وأنا تحولت من زوج ياسمين لأخوها الثالث مش طليقها. وتحولت ياسمين من زوجتي لأختي التانية مش طليقتي. وغلاوتها في قلبي هتفضل زي غلاوة ندى اختي لآخر يوم في عمري! خيال علمي بالنسبة لكم؟ معلش. إحنا كنا أسرة خيال علمي. ادعو لياسمين بالرحمة والمغفرة. وادعو لبنتها ولأهلها بالصبر والقوة. ويا ريت كفاية ترندات وقرف وسيبونا في حالنا بجد".

تفاصيل اللحظات الأخيرة في حياة ياسمين أبو النجا

وكان الفنان والمهندس سيف أبو النجا قد كشف تفاصيل الأزمة الصحية واللحظات الأخيرة في حياة ابنته الراحلة "ياسمين"؛ موضحاً أن الأخيرة عانت منذ ولادتها من تشوّه خِلقي نادر في القلب، وكانت قد خضعت في طفولتها لعملية جراحية معقدة في العاصمة الفرنسية باريس، قبل أن تتدهور حالتها الصحية في أيامها الأخيرة نتيجة مضاعفات وإجهاد بدني عقب خضوعها لفحص بالمنظار استغرق وقتاً طويلاً بأحد المستشفيات.

وأشار سيف أبو النجا خلال مكالمة هاتفية مع المذيعة نهال طايل، بقناة "صدى البلد"، إلى أنه تمكن من التواجد إلى جوارها داخل غرفة العناية المركزة في لحظاتها الأخيرة قبل أن تفيض رُوحها؛ مؤكداً استسلام الأسرة لقضاء الله وقدره.