ازدادت سَاحة الاتّهامات المُتَبادلة بين حلا شيحة والنجم تامر حسني سخونة جراء ما أحدثته حلا صباح اليوم من نشرها تعليقاً مطولاً على حسابها على انستقرام تنتقد فيه تامر حسني بسبب نشره فيديو كليب «بحبك» من فيلمه الجديد «مش أنا»، وتَضَمُّنه مَشاهد أحضانها معه، وهو ما رَدّ عليه تامر حسني في تعليق مُطَوّل نَشَرَه عبر صفحاته الرسمية على السوشيال ميديا يَرُدُّ فيه على اتّهامات حَلَاَ شيحة بعدم خيانته الأمانة، وغيرها من الاتهامات التي تكفل تامر حسني بالرد عليها.
ودخلت زوجة تامر حسني، الفنانة المعتزلة بسمة بوسيل على خط الأزمة بين تامر وحلا، وزاد في تعليقها على حلا شيحة برد اعتبره الكثيرون فيه قسوة في الرد.
بسمة بوسيل لحلا شيحة: طلاقك اقترب
وقال حساب غير موثق لبسمة بوسيل في منشور تم نشره على خاصية القصص المصورة على «انستا ستوري علىى انستقرام»: «مجرد رأي شخصي.... مستفزة جداً بجد... هو حد ضربك على إيدك عشان تعملي الفيلم»، وأضافت: «مش عملتيه وقبضتي فلوسه... هي الناس تحت أمرك... ممثلين كتير تابوا عن أعمالهم ما شفتش حد عمل زيك».
تامر حسني ليس مجبراً على تحمل خسارة فيلم صُرِفَت عليه الملايين
وزاد الكيل بسمة بوسيل لحلا شيحة قائلة: «هو تامر حسني مش مجبر يشيل فيلم تصرف عليه ملايين عشان حضرتك فوقت لنفسك مرة واحدة وشوية وهتطلقي وهترجعي تاني عادي كالعادة... مستفزة بجد».
تامر يرد على اتهامات له بـ«الحرام» و«التوبة»: طلبت أجراً كبيراً ووافقت ثم تقولين الكليب حرام!!
رد النجم تامر حسني منذ قليل على اتهام حلا شيحة صباح اليوم بإخلاله بوعده معها ونشر فيديو كليب من فيلمه الجديد «مش أنا»، وقال في منشور طويل عبر حسابه على انستقرام قائلاً: «نهاركم جميل يا أغلى الناس... الحقيقة عمري ما بتخيل إني أدخل في نقاش بالشكل ده مع زميل بحترمه وكان في بينا كل خير». وأضاف حسني: «للتوضيح بما إنّك يا حلا كتبتي بوست وأشركتِ الجمهور الكريم معانا بدال ما كنتي تكلميني شخصياً ونتناقش بيني وبينك، فإنا مضطر أرد هنا برضو».
لم أعدك بشيء وحذفت مشاهد كثيرة فيها أحضان بسببك يا حلا
وتابع حسني: «أولاً أنا عمري ما وعدتك إن الكليب مش هينزل دا محصلش أصلاً يا حلا، مش أنا خالص اللي أوعد وأخلف..... الحقيقة إني احترمت كلامي معاكي ووعدتك أشيل مشاهد تانية طلبتيها وشيلتها بالفعل وشكرتيني عليها ولو حابه تفتكري المشاهد اللي اتشالت بعد اذنك روحي شوفيها في المونتاج عند الأستاذ عمرو عاكف أو كلميه يبعتهالك كلها موجودة».
منطق غريب فعلاً يا حلا... الكليب حرام على اليوتيوب وداخل السينما حلال
وأوضح تامر: «وبعدين الفيلم بقاله ٣ أسابيع في السينمات والكليب موجود جوه الفيلم... هو بالنسبالك الحرام إننا ننزل الكليب على اليوتيوب بس!! إنما الكليب يتشاف جوه السينمات عادي؟؟؟؟ منطق غريب فعلاً يا حلا».
لم يجبرك أحد على التمثيل وتعاقدت عليه بمحض رضاك وتحصلت على أجرك كاملاً
ويتعجب تامر حسني من حديث حلا شيحة قائلاً: «وبعدين هو مش أنتي اللي مضيتي عقد وتقاضيتي عليه مبلغ كبير عشان الدور دا بعينه!!!!! هو مش إنتي اللي صورتيه ومثلتيه بنفسك وبمنتهى الرضا ولاّ حد أجبرك؟!!!!!!».
اتصلنا بكِ مِراراً ولم تَرُدِّي علينا لإرسال ملاحظاتك
ثم يكمل استنكار تامر حسني من تعامل حلا شيحة: «وللتوضيح للجمهور الكريم أنا والمخرجه الأستاذه ساره وفيق بعتنالك وكنا بنتحايل عليكي تيجي تشوفي شغلك قبل إصدار الفيلم عشان لو عندك أي ملحوظه تقوليها، ماكنتيش بتردي علينا وتليفوناتك كلها كانت بتقفل في وشنا».
حلا لم تعاملني باحترام وأغلقت هواتفها في وجهننا
وأوضح تامر حسني: «إنتي للأسف يا حلا متعاملتيش صح مع الموقف كان لازم تهتمي بأمرك أكتر من كدا ولو كان ليكي أي طلب تاني كنت هعمله بكل حب».
ويرد تامر حسني في انتقاده لحلا شيحة: «إنما إنتي فجاه أختفيتي ومكملتيش تركيب صوتك في الفيلم ولا جيتي تتصوري عشان أفيش الفيلم أصلاً ومخليتيناش نعرف نعمل آفيش مجمع!!! وبقيتي تقفلي تليفوناتك وتكنسلي علينا كلنا وبعدين أي فيلم بيبقى ليه خطه مسبقه في الدعايه وانتي عارفاها كويس ووافقتي عليها ودا كليب رومانسي يعني معقول كنتي عايزه المنتج يشيل كل مشاهدك اللي صورتيها من الكليب ويطلعني بغني وبقول الكلام الرومانسي دا للأستاذ ماجد الكدواني مثلاً هو دا يُعقل ؟؟!!!!! أنا زعلان منك جداً يا حلا على مفردات البوست بتاعك الغير موفقه ومستحيل هرد بطريقتك اللي فيها تجريح واتهامات باطله ليا احتراماً لحجات كتير يمكن فايتاكي بس مش هتفوتني وعلى فكره أنا واثق انك عارفه اني مستأهلش منك كدا وهكتفي بالتوضيح دا وربنا يهدي الجميع ويكتبلك كل الخير اللهم آمين».
كانت حلا وَجّهت رسالة عِتاب طويلة وقوية لزميلها النجم تامر حسني، اتّهمته فيها بالإخلال باتفاق حدث بينهما يقضي بحذف المشاهد الرومانسية من فيلمهما الأخير «مش أنا» مراعاة لظروفها الحالية كسيدة متزوجة من داعية، وقالت إن ما حدث «لا يرضي الله» وأنها تابت عن تقديم مثل هذه المشاهد.
حلا نشرت لأول مرة بوستر فيلم «مش أنا» عبر حسابها بموقع انستقرام، واعتمدت البوستر القديم الذي لا يظهر أبطال الفيلم، وعلقت قائلة: «أنا اتفاجئت جداً بنزول كليب يجمع فيه مشاهد متفرقة من الفيلم وفي أيام ذي الحجة أيام مباركة وخصوصاً بعد آخر بوست نزلته ووضحت فيه أنا ايه». وتابعت قائلة: «واتفاجئت اكتر خصوصا ًبعد وعد تامر حسني ليا وتأكيده أنه حيحترم رغبتي وبعض الطلبات اللي طلبتها منه بكل احترام وود الصيف اللي فات وأكد لي أنه حيحترم رغبتي...».
وواصلت حلا عتابها بقولها: «احنا يمكن نجحنا بمقايس الدنيا بس صدقوني بمقاييس ربنا احنا لم ولن ننجح أنا عارفة ومتأكدة أن زملائي جواهم خير بس للأسف فتنة الشهرة والنجاح مش بتخلينا نشوف ونقيس الأمور صح». وأكملت حلا: «بتكلم من قلبي الكليب ده ميرضيش ربنا وأنا عيطت لاني شفت نفسي في المشاهد دي... دي كانت زلة نتيجة ظروف مريت بيها وكلنا بنغلط ولازم نغلط علشان احنا بشر بس المصيبة أننا بنغفل وبننسى». واستطردت: «أنا مش حتكسف من حد أنا تبت من المشاهد دي وهي لا تصح وأنا غلطت وبصلح وأهم حاجة أن ربنا يرضى عني لأن في الآخر ده اللي حينفعنا مش الشهرة ولا النجاح لا هو مش نجاح أصلا علشان النجاح الحقيقي حاجة تانية خالص احنا أغلبنا ناسينها إلا القليلين منا».
وأكدت حلا: «الفن لو بيخلينا نبعد عن منهج ربنا ومنبقاش قدوة لولادنا يبقي باطل وميبقاش فن، احنا كلنا عندنا امتحان في الدنيا دي وحابة افكرك بالفيديو ده يا تامر اللي قولت فيه أنا مش بتمنى أموت وأنا مطرب أنا دايما خايف من كده... كلام أكيد قولته في لحظة صدق جواك وجوانا كلنا شوفه تاني يمكن يفكرك أن جواك أكيد في صراع وأنا وكلنا».
وسبق أن نَشَرَت حلا شيحة رسالة بَرّرت فيها أسباب غيابها عن العرض الخاص لفيلم «مش أنا» وعدم المشاركة في الدعاية له رغم أنّه أول فيلم من بطولتها بعد عودتها من الاعتزال، وقالت تعليقاً على صورة تجمعها بزوجها معز مسعود عبر حسابها بموقع انستقرام: «بحمد ربنا أني أخيراً وجدت التوازن بين أن أكون سعيدة في حياتي وفي نفس الوقت أكون صادقة مع نفسي واللي مؤمنة بيه من جوايا».
وأضافت حلا: «أما بالنسبة لفيلم (مش أنا) الحقيقة أنّه تمّ تصويره من أكتر من سنة ونص وبسبب ظروف كورونا أتأخر جداً نزوله، وأنا كمان حالي اتغير واتجوزت الحمد لله، والفيلم فعلاً بقى (مش أنا)... وبتمنى التوفيق لكل زملائي... جمعة مباركة».
فيلم «مش أنا» فكرة وسيناريو وحوار وبطولة تامر حسني وإخراج سارة وفيق، ويشارك في بطولته حلا شيحة، وماجد الكدواني، وسوسن بدر، وشيرين، وحجاج عبد العظيم، بجانب عدد من ضيوف الشرف، منهم إياد نصار، محمد عبد الرحمن، وعصام السقا.
*تامر حسني على انستقرام
*حلا شيحة على انستقرام تتهم تامر حسني
*أغنية تامر حسني «بحبك» مع حلا شيحة
