شن الفنان أحمد فلوكس هجوما قاسيا على نجوم الفن الذين بادروا لتقديم العزاء في اليوتيوبر الشاب مصطفى حفناوي، عقب وفاته متأثرا بمضاعفات جلطة في المخ، وأكد فلوكس أن الراحل حاول دخول عالم الفن ولم يجد دعما من كل هؤلاء النجوم، وسقط صريع المرض ولم يدعمه في أزمته إلا الفنان تامر حسني، وطالب باحترام حرمة الميت والتزام الصمت.
ونشر فلوكس مقطع فيديو عبر حسابه بموقع الفيس بوك قال فيه: أبويا علمني مغلطش في حد كبير، وأنا معرفش مصطفى حفناوي، ولكن متابع حالته من عدة أيام، محدش زاره غير تامر حسني لأن تامر راجل، بقاله 7 أيام بيناشد عايز يتعالج، مسمعناش عن اللي كتبوا عنه في طبق اليوم، دلوقتي كله الله يرحمه، كله بما فيهم الأستاذ الفاضل الكبير هاني شاكر، اللي قال أنا معرفوش بس قلبي وجعني، طب قلبك موجعكش وهو مش لاقي مستشفى تستقبله وهو عنده جلطة في مخه؟؟”.
وتابع غاضبا: اتقوا الله كفاية متاجرة بالبني آدمين، كفاية، إيه دا إيه دا، ما كان بقاله 6 أيام مش لاقي حد يعالجه أو يساعده، اللي عرف الناس القصة لما تامر حسني راح زاره، دلوقتي بقى كله فاكره، أستاذ هاني شاكر هو تامر حسني النقيب ولا أنت، اتقوا الله، انتو بتاجروا بموت بني آدم، دا شاب وصغير، الناس اللي كاتبين الله يرحمه الفنانين والفنانات والمنتجين كنتوا فين وهو يوتيوبر وكان عايز يمثل، وهو بيروح من الكرفان دا للكرفان دا وعايز يمثل، مخلتهوش يمثل ولا يبقى فنان ليه”.
وأضاف: ولا لما مات افتكرتوه، إيه دا، طيب مش انتو زعلانين عليه، أنا بطالب كل اللي كتب الله يرحمه إنه يروح يبني جامع باسمه مدام انتو رجالة أوي كدا، احنا في زمن غريب، آل الفنان هاني شاكر بينعي كنت فين وهو مش لاقي مستشفى، وقبليه ملحن ولا موزع مات عشان مرمي في مستشفى مش عارف يتعالج، انتو إيه نوعيتكو إيه انتو، بنتاجر بموت الناس، وإيه كل الأسامي وكل النجوم وكل الزفت، مهو مات، بتاخدوا لقطة على واحد ميت، نحن في زمن، يا ريت الكورونا كانت علمتكو حاجة، طلعتوا منها جعانين أكتر.
فلوكس حذف الفيديو ونشر مقطعا آخر تضمن اعتذارا لنقيب المهن الموسيقية هاني شاكر، مؤكدا أن نقيب المهن التمثيلية الفنان أشرف زكي تواصل معه، لافتًا إلى أنه لم يكن يقصد ما قال، وأنه لم يقصد الإساءة لأحد، ولكنه ألقى باللوم على كل من ينعي مصطفى حفناوي، حاليًا ولكنهم لم يعرفونه.
وأكد فلوكس، أن الفنان هاني شاكر، قامة كبيرة، وصديق لوالده، وهو يكن له كل احترام وتقدير، وأن الفنان تامر حسني، هو الوحيد الذي وقف بجوار مصطفى حفناوي، وحرص على زيارته، مشيرًا إلى أن هناك بعض الأشياء التي لا يحب التحدث عنها، وربطها بما سبق، لأن حفناوي أصبح في ذمة الله.
لمشاهدة أجمل صور المشاهير زوروا أنستغرام سيدتي
