اكتب الكلمات الرئيسية فى البحث

هاني شاكر ينتقد محمد رمضان ونصيحة لهيفاء وهبي

هاني شاكر - الصورة من حسابه على الفيس بوك

جدد المطرب هاني شاكر نقيب المهن الموسيقية في مصر، انتقاده لإطلالات الفنان محمد رمضان في حفلاته الغنائية، مؤكدا أن الأخير لا يملك صوتا ولا موهبة الغناء، وبعتبره مجرد ظاهرة ستتلاشى مع الوقت، وتحدث عن نصيحته للنجمة هيفاء وهبي بارتداء ملابس على المسرح "أكثر طولا"، كما أكد عدم اعترافه بأغاني المهرجانات مشيرا إلى أن مجلس النقابة يشاركه الرأي.

 

محمد رمضان
محمد رمضان - الصورة من حسابه على الفيس بوك

وأضاف شاكر في مقابلة تلفزيونية مع برنامج «شربل يستقبل»، المذاع على قناة "CNN عربية": الحفلات فى مصر لينا تقاليد وعادات غير أوروبا وأمريكا، واللى ينفع هناك ممكن مينفعش هنا، ومحمد قد يكون حب يعمل شيء مختلف وجديد، وهو مش مطرب أساسا وعايز يعمل شو وشكل مختلف، ولكن قد يكون الشكل المختلف ده غير مقبول فى مصر.

 

 

وتابع قائلا: أنا بشوف إنه حتة إنى أطلع نصى الفوقانى عريان على المسرح دى تقريبا إحنا أول مرة نشوفها من محمد رمضان، وبرضه اللى بيطلعوا ومش بيعتمدوا على صوتهم وأغانيهم، ولكن بيعتمدوا على رقصهم وملابسهم دى فترة ومش بتستمر، وأنا ضد ده بصراحة.

 

وتحدث هاني عن نصيحة قدمها إلى هيفاء وهبي بسبب ملاحظات على ملابسها في إحدى الحفلات داخل مصر وقال: كانت هيفاء وهبي لابسة لبس خارج عن الطبيعي والعادي، وقصير زيادة عن اللزوم، وأنا تواصلت معها وكلمتها بمنتهى الحب، وهي طبعا بتحترمني وتحبني جدا، وقلت لها: المصنفات اعترضت على الصور اللي ظهرت، واللي ينفع يتلبس في أوروبا مينفعش يتلبس في مصر، وهي تقبلت كلامي.

 

وتوقف هاني أمام ظاهرة لجوء نجوم الغناء للملابس الغريبة والمثيرة وقال: إن هناك بعض الفنانين الذين يظهرون على المسرح ويغنون ولكنهم لا يعتمدون على أصواتهم وأغانيهم، وإنما على الرقص والملابس المثيرة.

 

وأضاف: أول ما جيت النقابة كانت واخداني الجلالة وعملت بيان قولت فيه إننا عايزين نطور الفن، وقولنا إن الفنانات المصريات والعرب يلتزموا شوية في الملابس اللي بيظهروا بيها على المسرح، ولكن ساعتها مخلصناش وقالوا إننا بنتحكم في لبس الفنانات، ودخلوا الموضوع في كلام فارغ أو سخيف.

 

ووجه هاني شاكر رسالة إلى نجوم الغناء بصفته نقيب الموسيقيين المصريين قائلا: كن حريصًا على تقديم الفن الراقي والجيد لأن هذا هو ما يعيش مع الجمهور، إضافة إلى الحفاظ على نفسك وجمهورك، والفنان في النهاية ملك جمهوره، ويجب عليك أن تراعي ربنا في الفن الذي تقدمه، يعني أنا ممكن أنجح وأنا طالع شبه مش لابس، وسهل قوي أطلع أعمل رقص غريب وملفت عشان أعمل تريند على السوشيال ميديا.

 

وأكد هاني شاكر، أن موقفه من أغاني المهرجانات لم يتغير واضاف: لا أنا ولا مجلس إدارة النقابة بنعترف بحاجة اسمها المهرجانات، والنوع ده موجود عشان يقولوا أي كلام خارج، لكن الجانب الموسيقي من غير كلام، مفيهوش لا عيب ولا حرام، ودي نوعية من الأغاني، والأصوات اللي دخلت النقابة ونجحت قعدنا معاهم، وطالبناهم بالاهتمام بالمزيكا اللي بتتقدم، واهتمام بالرقي.

 

وعن تحقيق نسب مشاهدات بالملايين للمهرجانات، قال: العشر سنين اللي فاتوا اختفت الحفلات العامة في التليفزيون المصري، وبالتالي تُركت الساحة مفتوحة للمهرجانات والإعلانات، وأنا ليا اعتراض على الرقص غير المبرر في الإعلانات، وأنت بتتكلم على أي حاجة بتلاقي رقص، لو كومباوند الناس بترقص، لو أكل معين الناس بترقص، ولو خط موبايل جديد الناس بترقص، ولابسين حاجات زي اللي كان بيلبسها شعبان عبدالرحيم، وده مش ممكن، وده اللي ولادنا قاعدين يتفرجوا عليه طول النهار، إحنا محتاجين فن مضاد زي المضاد الحيوي اللي بتاخده علشان تعدل المسيرة الفترة المقبلة،

 

ووجه رسالة إلى حسن شاكوش، قائلا: اشتغل على نفسك، ومرّن صوتك أكتر، وأقول لشيرين عبد الوهاب قلبي معاكي، لأني عارف إنها بتمر بظروف عائلية صعبة، وبدعيلها من قلبي إنها ترجع مرة أخرى، وتبقى مركزة في شغلها أكتر، وربنا يروقلها حياتها وقلبها، وهي صوت جميل وعلاقتي بيها من زمان، ومن حبي ليها توسطت بينها وبين نصر محروس وخلصت لها المشاكل بتاعتها لأن كان صعبان عليا إني ألاقي كل الأخبار اللي بتتكتب عن شيرين إنها معمولها محضر في الحتة الفلانية.

لمشاهدة أجمل صور المشاهير زوروا أنستغرام سيدتي

ويمكنكم متابعة آخر أخبار النجوم عبر تويتر "سيدتي فن"