كشفت النجمة السورية سارة نخلة عن مشروع خاص بعيد عن الفن أطلقته سرا منذ ثلاث سنوات لمساعدتها على الوفاء بالتزاماتها المالية، مؤكدة أن ما فعله زميلها كريم الحسيني بافتتاح مقهى متحرك لتقديم المشروبات الساخنة، هو الفعل الطبيعي لأي فنان يحترم مهنته، ولا يرغب في قبول المشاركة بأعمال فنية دون المستوى لسداد نفقاته.
وأضافت سارة نخلة عبر منشور طويل بحسابها الشخصي على موقع الفيس بوك: انا حاسة ان في ناس كتير اوي مستغربة اوي ان زميلنا كريم الحسيني المحترم عمل كدا و اشتغل حاجة جنب التمثيل ومش فاهمة ليه مستغربين اوي مع انه موقف رجولي جدا و طبيعي اي راجل مكانه هايعمل كدا.
تابعت قائلة: الجمهور فاكر ان الممثلين دول بياخدوا ملايين و ان الممثل كائن فضائي مثلا و بيروح يصور كم شهر وياخد شوال فلوس وهو ماشي، على فكرة بس لازم تعرفوا ان الممثل انسان مرهف حساس جدا و ان الممثل برضو راجل و مسؤول و عنده مسؤوليات كتير و كلنا على فكرة انا بنت و عليا اقساط و عندي عيلة فرقبتي وبشتغل من وانا عندي ١٩ سنة و انا لسه في الجامعه و مسؤولة اكتر من ستين راجل مع بعض وغيري زميلتي ممثلة وعندها اقساط و غيرها عندها مسؤوليات و عيال و بيت و شايلين حمل كبير اوي وبرضو ماحدش بيتكلم عشان بجد ماحدش بيصدق و فاكرين الممثل دا بيفطر الصبح كاڤيار.
وكشفت عن مشروعها الخاص قائلة: انا من ٣ سنين عاملة مشروع خاص ليا ومش بتكلم عنه ومش بحب اقول بس عملت كدا عشان مايجيش يوم اضطر اشتغل عمل مش راضية عنه عشان الفلوس و عشان انا متغربة و الكلام دا بس بجد لازم الناس تحس بالممثلين بجد الممثل انسان حساس و مرهف و بيبقى عنده حمول كتيرة اوي و برضو بيظهر بالشكل اللائق المحترم و هو شايل الهم جواه.
أضافت قائلة: ولازم نتعلم كلنا برضو اننا بجد لازم نعمل شغل جنب التمثيل بجد عشان انت اليوم بتشتغل اكيد ان بكرا غيرك لازم يشتغل، اكيد اكيد اكيد ان السيزون او السنة مش هاتشيل كمية المواهب دي كلها خلينا واقعيين، انا اشتغلت السنة الي فاتت مش شرط كل سنة اشتغل ومش شرط كل الي يجيلي يعجبني ومش مضطرة اقبل حاجة مش عاجباني يبقى ايه ... استنى الشغل الي على مزاجي !!! اكيد لا.
واختتمت رسالتها قائلة: ما هو كريم عمل كدا و نزل اشتغل و ما استناش عشان راجل محترم و مسؤول مش نطع قاعد مستني الي تصرف عليه و لا مستني الشغل يجيله و لا عايش على قفا الناس ربنا يكرم الجميع.
يذكر أن كريم الحسيني قام بنشر مقطع فيديو للكشف عن سبب لجوئه لتحويل سيارته إلى مقهى متحرك لتقديم الشاي والقهوة والمشروبات الساخنة على الطرق السريعة، مؤكدا إنه يرفض أي مساعدة مالية ويشكر كل من تطوع لدعمه، لافتا إلى أن عمله في الفن لا يكفى احتياجاته كزوج واب، ووجد إنه بحاجة لمشروع آخر يدر دخلا مناسبا، وأكد إنه لا يملك ثمن تأجير وتجهيز مقهى، فقرر تحويل سيارته.
وأضاف كريم الحسيني في فيديو عبر إنستغرام قائلا: شاهد قبل الحذف اعترافات الفنان كريم الحسيني (في إشارة إلى المزاح)، وقال: بشكركم جدا على مشاعركم الجميلة، خصوصا السادة الفنانين وكل الناس التي أجمعت على مساعدة كريم، بجد بشكركم جدا على مشاعركم، ولكن الحمد لله الدنيا مستورة.
وعن سبب تفكيره في هذا المشروع قال: لم أفكر في عمل مشروع مثل هذا، كنت عايزه يسند معايا، عشان الشخص ميشتغلش اللي هو مش عايزه دون المستوى، فتضطر تقبل عشان مفيش فلوس وتاخد عربون عشان تمشي البيت، وفي الآخر العمل يتحسب عليك.
وواصل قائلا: لم تيجي تدخل عمل مهم وانت بتحلم بي، يقولك لا مش هينفع يشتغل معانا عشان اشتغل كذا وكذا، وأنا معنديش عمل في رمضان، ولكن الحمد لله مستورة، وفتحت مشروع مثل أي فنان أو أي شخص بيفتح مشروع، وفيه فنانين كتير فاتحين كافيهات، ولكن عربية القهوة أنا اخترتها عشان بسيطة عليا، وممكن أفتح كافيه ويخسر.
وتابع قائلا: أنا عملت كدا عشان مشتغلش شغل ممكن يضايقني وأيضا لم أتعاقد على عمل في رمضان القادم».
وقال: عايز أشكر كل الجمهور والناس اللي دعمتني وكانوا فخورين بي، والشغل مش عيب، واتمسك بحلمك ولو الشغل شريف محدش ليه عندك حاجة، وعلى فكرة أنا لسه مخلص مسرحية زقاق المدق، وهترجع تاني في العيد القادم، وبشارك في عرض آخر من 2018 بعنوان أمر تكليف وهنسافر بيه محافظات مصر ومبسوط أن العرض راجع تاني.
واختتم: كل الأشخاص حوالينا عارفين موظفين مسرح الدولة بيشتغلوا حبا في الموضوع ولما بنشارك في عمل مثل أعمال المسرح بندفع أكثر من الأجر المقابل، ولكن حبا في المسرح.
لمشاهدة أجمل صور المشاهير زوروا «إنستغرام سيدتي»
وللاطلاع على فيديوجراف المشاهير زوروا «تيك توك سيدتي»
ويمكنكم متابعة آخر أخبار النجوم عبر «تويتر» «سيدتي فن»
