عبر ثلاثة منشورات متتالية، شاركت الفنانة رحمة حسن جمهورها معاناتها بعد تعرضها لـ"عضة كلب" مفترس، حيث طلبت مشورتهم حول طريقة التعامل مع صاحبة الكلب، خاصة أنها أصيبت بجرح عميق ولا تزال تعاني من النزيف، وبعدها طمأنت الجمهور بنشر صورة تثبت تلقي الكلب للتطعيمات اللازمة، ثم اختتمت القصة بإعلان الاتفاق مع صاحبة الكلب بضرورة إيداعه مركزاً متخصصاً لإعادة التأهيل.
رحمة حسن أثارت الكثير من الجدل على مواقع التواصل الاجتماعي، بعدما أشارت إلى موضع "العضة"، ووصفته بـ"الحساس"، وبعدها كشفت تطورات حالتها الصحية عبر حسابها بموقع إنستغرام، قائلة: "مساء الخير.. أنا متشكرة جداً لاهتمامكم ولكل الناس إلى كلمتني تطمّن عليا، وآسفة إني ماقدرتش أرد على معظم الناس لأني كنت تعبانة ومش قادرة أتكلم".
وأضافت: "أنا روحت المستشفى النهارده وكشفت عند جراح متخصص وهو غيّر على الجرح وعمل اللازم، والحمد لله طمّني، وقالي أتابع معاه الفترة الجاية وإني هاكون كويسة إن شاء الله والجرح هياخد وقته وهايخف".
وتابعت: "بالنسبة للكلب، فإحنا اتكلمنا مع صاحبته وطلبنا منها توديه مركز تأهيل وتدريب علشان تعدّل سلوكه، وتبعت لنا الورق الرسمي اللي بيثبت إنها ودت الكلب فعلاً، وإلا هاعمل محضر.. وساعتها الكلب إللي هايتضر، ودي حاجة ماترضيش حد.. وهي كانت متفاهمة جداً ووافقت وقالت إنها هاتعمل كده أول الشهر الجاي، علشان أخوها اللي هايوديه ويتولى مسؤوليته".
واختتمت بقولها: "الحمد لله أنا كويسة والكلب كويس، وأتمنى إن صاحبة الكلب تصدق في كلمتها وتودي الكلب فعلاً مركز تعليم ويبقى كويس".
وقبلها سردت رحمة حسن التفاصيل الكاملة لواقعة تعرضها لهجوم من كلب شرس من فصيلة الجيرمن شيبرد، وقالت: "إمبارح الساعة ١١ بالليل كنت نازلة أجيب حاجة من السوبر ماركت جنب البيت، كنت ماشية على الرصيف، وكان في عربية بتركن جنبي عادي، فجأة الباب اتفتح، ولقيت كلب جيرمن شيبرد بيهجم عليَّ بكل قوته".
وتابعت: "طبعاً حاولت أجري، لكن للأسف الكلب كان قوي وشرس ووقعني على الأرض، حاولت أقوم وأجري وصاحبته حاولت تشده، بس فك الليش بتاعه وعضني عضة كبيرة وغويطة بنابه في منطقة حساسة".
وأضافت: "صاحبة الكلب كتّر خيرها أخذتني فوراً على مستشفى إمبابة، إدوني حقنة تطعيم الكلب، ولسه فاضل لي ٤ هاخدهم خلال شهر، بس المشكلة إن من إمبارح الجرح بينزف دم كتير، وأنا طبعاً خايفة ومصدومة وتعبانة وعندي تروما من إمبارح، واللي واجعني أكتر إني مَش عارفة أتصرف إزاي، خصوصاً إني أكيد مِش عايزة الكلب يتئذي، بس كمان مِش عايزة أي إنسان كمان يتئذي ويتعض ويتبهدل في الشارع زيي".
وأكدت رحمة حسن أنها اعتادت رؤية صاحبة الكلب وهي تنزهه، وكانت تتجنبه، موضحة: "أنا كنت بشوف الكلب ده دايماً مع صاحبته بتمشي بيه في الشارع جنب البيت عندي، وعشان شكله شرس كنت بامشي بعيد عنه لما بشوفه، إمبارح صاحبة الكلب قالت لي: متخافيش هو عضّ ولادي قبل كده وتمام محصلش حاجة!".
وقالت: "طبعاً أنا اتصدمت لما عرفت أنها مِش أول مرة الكلب يعض حد، ومع ذلك هي سايباه عادي في الشارع من غير كمامة أو حد قوي يمسكه، بجد حرام عليكم، الكلب لما بيكون حجمه كبير وشرس بيعتبر سلاح، وصاحبه مسؤول مسؤولية كاملة عنه، ويحاسب على إهمال مسؤوليته، خصوصاً لو إهماله تسبب لشخص تاني في أذى بدني يحتاج أكتر من ٢١ يوم علاج، وأذى نفسي ماعرفش هايحتاج قد إيه عشان يخف!!".
وأوضحت: "أنا كنت بحب أنزل أحط أكل ومياه للكلاب والقطط تحت البيت، دلوقتي أنا حقيقي مرعوبة أقرب منهم وخايفة جداً، أنا آسفة طولت عليكم.. بس أنا بجد مِش عارفة المفروض أعمل إيه عشان محدش تاني يتئذي".
واختتمت رحمة القصة بنشر صورة من دفتر تطعيمات الكلب، تؤكد حصوله على تطعيم السعار، ورغم ذلك تلقت نصائح بضرورة استكمال جرعة التطعيمات؛ للتأكد من عدم إصابتها بالفيروس القاتل.
لمشاهدة أجمل صور المشاهير؛ زوروا «إنستغرام سيدتي».
وللاطلاع على فيديوغراف المشاهير؛ زوروا «تيك توك سيدتي».
وتمكنكم متابعة آخر أخبار النجوم؛ عبر «تويتر» «سيدتي فن».
