اكتب الكلمات الرئيسية فى البحث

صابرين بالفيديو: ما فعلته حلا شيحة مريب وغامض "وفي حاجة غلط"

حلا شيحة - الصورة من حسابها على الفيسبوك

علقت الفنانة صابرين على الموقف الأخير لزميلتها النجمة حلا شيحة، مؤكدة أنها تتفهم تعرض بعض النجمات لاضطراب نفسي يدفعهن للاعتزال وارتداء الحجاب، وأنها نفسها تعرضت لنفس الضغوط سابقا، ولكن توقفت صابرين أمام بيان حلا شيحة العدائي ضد الفن ووصفته بالمريب والغريب، كما رفضت موقف حلا من والدها وقالت إنه كشف عن وجود "حاجة غلط" في حياة شيحة.

صابرين
صابرين - الصورة من حسابها على إنستغرام

أضافت صابرين في لقاء خاص مع الإعلامية لميس الحديدي لبرنامج "كلمة أخيرة": بالنسبة لي كان موقف حلا شيحة مريب وأنا أعرفها وهي خالعة الحجاب وهي محجبة ومنقبة وفي مناسبات مختلفة جمعتنا .. لكن الموقف الأخير كان مريب حسيت وقتها إن فيه حاجة غلط.

 

 

تابعت قائلة: لما قرأت البوست كان غريب برضه انتي خلاص عملتي حاجة أو خدتي خطوة تمام بس مش كده يعني".

 

واصلت: مش عارفة ممكن تكون حلا شيحة تعرضت للتخبط في الفترة الاخيرة لما بعدت نسيت التمثيل وده عادي الفنان يتعرض   للتخبط.

 

أضافت صابرين: ما فعلته حلا شيحه كان "أوفر“شوية وأكثر ما أزعجني في أزمتها علاقتها بوالدها الفنان أحمد شيحة .. أي حاجة عادي لكن علاقتك بوالدك ماينفعش تبقى كده أبوكي راجل محترم جداً، وتابعت موجهة حديثها لـ حلا شيحة: براحتك أتجوزي واعملي الي إنتي عايزاه لكن معلش الاب والام مش خط أحمر بس ده خط " ملتهب".

 

وكشفت الفنانة صابرين ما مرت به في حياتها من ارتداء الحجاب ثم خلعه واستبداله بالباروكة ثم العودة لشعرها، قائلة: صابرين كانت بتعيش كل لحظة بصدق وده طبيعي كل ما بنكبر بنعيش لحظات معينة بصدق زي قصة حب عشتها.

 

 

وقالت صابرين: لما لبست الحجاب لبسته عن إيمان شديد وكنت في لحظات "لخبطة" وخاصة بعد مسلسل أم كلثوم حصل نجاح كبير.

 

تابعت: فيه أقنعة كثيرة اتشالت وسقطت بعد المسلسل من زملاء الفن بعضهم كانوا بيحبوني عشان حبوبه ولطيفة وبعدين فوجئت بالأقنعة دي بتسقط وقلت وقتها أنا إيه ده؟ إيه الي بيحصل ده؟  بإسم المنافسة انا مش بتاعت كده خالص .. أنا واحدة  بمشي جمب الحيط.

 

وتابعت صابرين: جتلي حالة عزوف وقتها وكان عندي انفصال ولخبطة خلتني أقعد في البيت لكن عن إيمان وإن الواحد بيحب يعمل اللي عايزه بصدق".

 

وواصلت قائلة: لما قررت خلع الحجاب مجدداً حسيت إن ده مش صح أوي ولا اللي قبله كان صح برضه أوي وسألت نفسي ليه أكون بثلاث وشوش أو بوشين ؟!"

 

وردت على انتقادات الهجوم عليها وقت ارتداء الباروكة قائلة: قلت لنفسي مع الهجوم والانتقادات وتعليق الشماعات؟ ليه أخلي الباب موارب زي كده، وسألت نفسي ليه كسب العالم واخسر نفسي مش صح لازم أكسب نفسي ولقيت نفسي حابه نفسي دلوقتي أكتر وشكلي مش "فيك" فيه تصالح ورضا.

 

وتابعت صابرين: العلاقة بيني وبين ربنا حاجة خاصة جداً دي علاقة في السر وهي أسمى العلاقات.

 

ووجهت رسالة لمنتقدي خلع الحجاب قائلة: الي هينزل معايا القبر يحاسبني .. فيه ناس بتدخل على السوشيال ميديا يوجهولي رسائل من نوعية بحبك في الله وانا بتقبل ده لكن فيه شريحة تانية شغالة بهدلة وتهزيء ودول لجان.

لمشاهدة أجمل صور المشاهير زوروا أنستغرام سيدتي

ويمكنكم متابعة آخر أخبار النجوم عبر تويتر "سيدتي فن"