اكتب الكلمات الرئيسية فى البحث

ماندو العدل: لازم نفرح بفيلم "ريش" ونفخر ب "عمر الزهيري "

عمر الزهيري متوجا بجائزة مهرجان الجونة - الصورة من حساب مهرجان الجونة على انستغرام
عمر الزهيري متوجا بجائزة مهرجان الجونة - الصورة من حساب مهرجان الجونة على انستغرام

واصل المخرج ماندو العدل دعم زميله عمر الزهيري بمواجهة حملة شرسة لانتقاد فيلم "ريش"، وأكد ماندو أن إعجابنا أو رفضنا للفيلم لا ينفى حقيقة أنه حقق إنجازا غير مسبوق للسينما المصرية بالفوز بجائزة مهرجان كان، وطالب الجميع بالفخر بالمخرج الشاب الزهيري ودعمه لتقديم أفلام جديدة.

ماندو العدل
ماندو العدل - الصورة من حسابه على الفيس بوك

ماندو نشر صورة من حفل تسليم عمر الزهيري جائزة مهرجان الجونة في دورته الخامسة، وعلق عليها عبر حسابه بموقع الفيس بوك قائلا: حتى لو الفيلم مش عاجبك ومش شبه ذوقك، ده ميقللش من حجم الإنجاز، انه أخد جائزتين من مهرجان كان لأول مرة في تاريخ السينما المصرية.

تابع قائلا: ميمنعش ان احنا المفروض نتشرف بعمر الزهيري وقبله سامح علاء اللي رفعوا راسنا ورفعوا اسم السينما المصرية في أكبر محافل السينما بالعالم، لكن ازاي نفرح ونتشرف !؟؟ عيب طبعا نفرح، احنا اصلا مبنعرفش نفرح ولا لنفسنا ولا لحد.

ورصد ماندو الاتهامات الموجهة إلى عمر الزهيري وسخر منها باعتبارها قائمة جاهزة توجه لكل فنان يقدم عملا مختلفا عن السائد وقال: لازم المخرج يبقي نيته وحشة والفيلم ممول ونظرية المؤامرة تشتغل والاحقاد والغل وكل اللي مالوش شغلانة اصلا يطلع يقطع في مخرج شاب ويقلل منه.. اللي عملوه عمر الزهيري وسامح علاء زي اللي بيعملوا محمد صلاح بالضبط.. رفعوا اسم مصر في الخارج.. واسمهم اتحفر في التاريخ واتمني يطلع ناس تانية كتير زي النماذج المشرفة دي.

وأضاف: احنا هنا اللي بياخد جائزة من مجلة محليه بيتتنك على الوسط والناس فما بالك ب مهرجان كان بقي

واختتم منشوره بقوله: انا فخور بيك يا عمر يا عشرة اكتر من ١٥ سنه وربنا يحميك وينجحك ورجعتني تاني لقعدتنا على سلالم المعهد ايام ما كنا بنحلم ونفكر، الجوايز اللي ربنا كرمك بيها يا عمر سينمائيين كتير في العالم بيحلموا بيها ويتمنوها، خليك دائما فخور بنفسك وابطالك والفنيين اللي كانوا معاك ولا يهمك من اي حد مستني فيلمك الجاي وسيري يا نورماندي.

بنفس الوقت كشف عمر الزهيري مخرج فيلم "ريش"، عن سعادته بحصوله على جائزة أفضل فيلم عربي في مهرجان الجونة، وأضاف خلال مداخلة هاتفية مع الإعلامي عمرو أديب، في برنامج الحكاية: أنا معروف من زمان داخل الوسط الفني المصري واشتغلت مع سينمائيين كبار والأيام اللي فاتت كنت مستريح نفسيًا وضميري مستريح وعارف إننا دولة كبيرة جدًا دايمًا بفخور بإني جزء من السينما، والعالم يبكرمنا على السينما، فيه هجوم كبير آه، لا محستش إني مش هخرج تاني.

وتابع: مكنتش متوقع جائزة من مهرجان الجونة ولا أي جائزة خالص لأنها منافسة صعبة بس كنت راضي جدًا بردود الأفعال المختلفة وتقدير النقاد المصريين على الفيلم ومبسوط إن حصل ده على أول فيلم ليا في حياتي وده بيعلمني ويضيف لي كتير.

ونفى عمر وجود أزمة مع الدولة المصرية بسبب الفيلم قائلا: الدولة كانت معايا من الأول متمثلة في كل الجهات ودائمًا بشكرهم وأقول إن دي بلد فيها فنانين وجود الفن القوي في الدولة بشكل كبير، مفيش منطق بيقول إن ده فيلم بيسيء لمصر لأن فيه رقابة ومنتج بيشوف العمل، مفيش فيلم ينفع يسيء للبلد ومش عمل فني هو اللي هيسيء للبلد، ومفيش حد اتكلم عن الفيلم بالطريقة دي.

يذكر أن فيلم ريش هو أول الأفلام الروائية الطويلة للمخرج عمر الزهيري، وشارك في تأليفه السيناريست أحمد عامر، والفيلم بطولة كل من دميانة نصار، سامي بسيون، محمد عبد الهادي، فادي مينا، أبو سفين نبيل، نعيم عبد الملك، محمد صدقي، يوستينا سمير، ناصر جلال، عبد الله، سامية.

لمشاهدة أجمل صور المشاهير زوروا "انستغرام سيدتي"

ويمكنكم متابعة آخر أخبار النجوم عبر تويتر "سيدتي فن"