بعد أسبوعين من غير كلام أحمد آمين يشارك جمهوره تجربة الصمت

تجاوز الفنان الكوميدي المصري أحمد آمين محنته المرضية التي منعته من الكلام طوال الأسبوعين الماضيين، وعاد إلي جمهوره ليقدم خبرته من التجربة المثيرة، ووعدهم بالعودة إلي تقديم أعماله الفنية في أقرب وقت.

أحمد أمين وجه رسالة مؤثرة لكل متابعيه على مواقع التواصل الاجتماعي قائلا: أنا الحمد لله بقيت أحسن كتير.. وهارجع اشتغل قريب جدا.. وباخد دلوقتي جلسات voice therapy دي حاجة لطيفة جدا واكتشفت انها ضرورية ومفيدة لكل اللي بيستخدم صوته كتير (ممثل – مغني – مدرس - .....) بس مش ده المهم.. المهم هو اني استفدت كتير جدا من تجربة الصمت.. أسبوعين منغير كلام فرقو معايا جدا ذهنياً.. وينفع يتكتب فيها كتب بس سريعا كده..

تابع قائلا: أولا لقيت نفسي عايز اكتب زي زمان.. مش عشان عندي كبت.. لأ.. عشان المخزون بيزيد.. ما هو لما بتقلل وقت الارسال وقت الاستقبال بيزيد.. أنا بقيت بسمع..

أضاف: قريت كتير.. قريت حتى حاجات متعلقة عالحيطة في المكتب والبيت من زمان قدام عيني وماكنتش قريتها.. وتقريبا قربت اسمع الحاجات كمان.. قربت اسمع الزرعة اللي عندي في المطبخ..

وواصل سرد تجربته بقوله: وكنت بتواصل مع الناس بالكتابة واحتفظت بشوية ورق منه لقيت الكلام ورا بعضه في سياق مسخرة مش مفهوم بالمرة.. أما الورقة اللي كنت بكلم فيها مراتي لقيت فيها 3 جمل بس.. (ياااه...؟ / ما هي غلسة وتستاهل/ وحاضر يا حبيبتي) بس .. وبيتكررو..

وفي إشارة لبيانه السابق حول طريقة التعامل مع أطفاله قال: كنت بشاور لاولادي.. وفهموني.. وما اضطريتش ازعق في البيت.. والدنيا كانت ماشية.. معناه ان لو القانون ان بابا مش بيزعق هايترتب على القانون ده ان كلنا هانسمع الكلام منغير زعيق..

واختتم الرسالة بقوله: الصمت محتاج صبر.. وعدم التعبير بالكلام محتاج بلاغة.. مش في انك تعرف تشاور.. لأ.. محتاج بلاغة في اختيار الكلمة اللي هاتشاور بيها عشان تلخص كل كلامك والناس تفهم.. من العجائب مثلا اني أنا طلبت الأوردر في الكافيه بالاشارة وجه مظبوط.. فيه بلاغة تانية في الاستماع.. انت ممكن تقول رأيك بتعبيرك وانت بتسمع.. ممكن تعطل أفكار اللي قدامك.. ممكن تشجعه.. وممكن توصل حاجات كتير بطريقة استماعك بس..

أضاف: اتفاجئت من الحاجات المشتركة بيني وبين ولادي وصحابي القريبين .. كانو بيفهموني بأقل الاشارات.. واتفاجئت ان ولادي مبسوطين جدا اني بسمعهم بس.. منغير ما اقول حاجة.. فقررت اني لازم اقضي وقت طويل بس بسمعهم.. اكتشفت انهم بس محتاجين كده.. مش عايزين معلوماتي العبقرية.. ولا أرائي في الحياة.. ولا حلولي الابداعية.. عايزينني مهتم.. بس.. ومن ألطف الحاجات اني لما كنت بشاور للناس كانت بتشاور لي حتى اصحابي اللي عارفين الموضوع.. حضرتك أنا بسمع.. أنا عندي مشكلة في صوتي بس..

وقال: من مصلحة أي انسان انه يسكت لأن التعبير المستمر السريع الغير محسوب عن أفكارك بيخليك مش لاحق تكون رأي متكامل وناضج.. أنا كنت بسمع حاجة وبسكت بلاقي رأيي بيتحسن تدريجيا.. وف معظم الأحوال كنت بحس ان رأيي مالوش لازمة أوي.. بقول لك ايه.. اسكت احسن.. اللي هو من الآخر كده..فلتقل خيرا.. أو لتصمت ربنا يشفي كل مريض.. وما يحرمش أي انسان من قدرته على التعبير..

يذكر أن أحمد أمين صدم جمهوره منذ أسبوعين بعدما كشف عن تعرضه لإصابة بالغة في الحنجرة، قد تستدعي خضوعه للجراحة بعدما أهمل في علاجها طوال الفترة الماضية، مؤكدا أنه ممنوع من الكلام لمدة ثلاثة أسابيع بتعليمات مشددة من طبيبه المعالج، وقدم اعتذاره من كل المتعاونين معه بسبب عدم قدرته على أجراء أية محادثات هاتفية طوال الفترة المقبلة، كما أعلن امتناعه عن المشاركة في أية أعمال فنية لحين استقرار حالته الصحية.

مضاعفات بسبب الإهمال

أمين الذي عرف طريق الشهرة عبر البرنامج الكوميدي "البلاتوه" وشارك النجم أكرم حسني بطولة مسلسل " الوصية" بموسم دراما رمضان 2018، كشف عن معاناته الصحية عبر بيان رسمي لم يخلو من طريقته الساخرة قائلا : حصل لي إصابة في الحنجرة.. والصراحة أهملتها .. بالتالي احتمال أعمل عملية بس الأكيد وللأسف مش هاينفع أستخدم صوتي أبدا لمدة ٣ أسابيع.

كوميديا صامتة

وأضاف: للأسف مش هاقدر اشتغل (إلا لو كوميديا صامتة).. والحمدالله اني مش مرتبط بحاجة وماحدش هايتعطل بسببي ... مش هاعرف ارد على التليفون.. بس اتفقت مع حد يزعق لولادي بدالي.. وهاشجع المنتخب بالإشارة بقى.. وقدر الله وماشاء فعل.

لمشاهدة أجمل صور المشاهير زوروا أنستقرام سيدتي

ويمكنكم متابعة آخر أخبار النجوم عبر تويتر "سيدتي فن"