تحدثت الفنانة جيدا منصور عن أحدث أعمالها الفنية، وعلى رأسها مسلسل "أندر إيدج- تحت السن"، وتجربتها في تقديم شخصية "هنا"، وذلك خلال استضافتها في برنامج "عيش صباحك" على إذاعة "نجوم إف إم".
جيدا منصور تكشف كواليس ترشيحها لمسلسل «أندر إيدج»
وكشفت جيدا منصور عن كواليس ترشيحها للمسلسل، قائلة: أنا أول ما جالي الدور ما كانش لسه السكريبت كله اتكتب، ففضل عندي أسئلة كتير عن الكاريكتور وعن إيه اللي هيحصل في الآخر، زي دلوقتي كده الناس وهي بتتفرج، ومع الوقت بدأت أشوف العمق بتاع الكاريكتور أكتر.
وأضافت: حسيتها مختلفة عن أي حاجة أنا عملتها قبل كده، وحسيتها بتتكلم عن جيل كده معين، أو نوع بنات في الجيل اللي موجود دلوقتي، ودي حاجة مش موجودة قوي في التلفزيون وفي السينما الفترة دي، ومفيش تركيز قوي عليها زي ما المسلسل عامل.
لماذا وافقت جيدا منصور على المشاركة في «أندر إيدج- تحت السن»؟
وتابعت موضحة سبب موافقتها على المشاركة في العمل: "فحبيت إنه، خصوصا إن أنا بتعامل مع السن ده كتير، فحبيت إن أنا أكون جزء من إن إحنا نوري الناس الجيل ده بيفكر إزاي، وإيه مشاكله، وإيه الحاجات اللي بيتعرض لها في المدرسة، ونشوف نقدر نقوي البيت مع الأهالي، ونشوف نقدر نحل ده إزاي".
كيف استعدت جيدا منصور لتجسيد شخصية «هنا»؟
وكشفت جيدا منصور عن استعداداتها لتجسيد الشخصية، مؤكدة أنها حرصت على معايشة الفئة العمرية التي يتناولها المسلسل، قائلة: "أنا بشتغل مع تينيجرز، بشتغل من سن 11 سنة تقريبًا أو أصغر شوية لحد 17 أو 18 سنة".
وأضافت: "فطبعًا وقت التحضير كنت مركزة معاهم قوي في الورش، بيتكلموا إزاي، إيه المشاكل بتاعتهم، بيهزروا إزاي، إيه المواضيع اللي مهتمين بيها، وإيه السوشيال ميديا اللي بيتعاملوا معاها أكتر، واهتماماتهم وكل حاجة".
وتابعت: "كنت مركزة معاهم، بس ما كنتش عايشة معاهم، كنت براقب من بعيد لبعيد".
جيدا منصور: أحداث «أندر إيدج- تحت السن» ليست مبالغًا فيها
وتطرقت جيدا منصور إلى مدى واقعية الأحداث التي يناقشها مسلسل «أندر إيدج- تحت السن»، قائلة: "أنا كان نفسي أبقى مقتنعة إن المسلسل مأفور، بس للأسف هو مش مأفور".
وأضافت أن أحداث المسلسل قريبة جدًا من الواقع، قائلة: "المسلسل مفيهوش مبالغة مقارنة بالواقع، بالعكس وإحنا بنصور كان فيه أخبار عن وقائع حقيقية قريبة جدًا من أحداث المسلسل، والأحداث دي موجودة لكن أعتقد إحنا ما بنتكلمش عنها".
قد ترغبين في معرفة أحداث الحلقة الرابعة من مسلسل أندر إيدج: داليدا في ورطة بعد تسريب مقطع فيديو ضرب "هَنا"
للمزيد من الأخبار أحداث الحلقة الثالثة من مسلسل أندر إيدج: مريم تستمر في البحث عن هَنا وتكتشف سراً خطيراً عنها
جيدا منصور: المسلسل يناقش مشكلات الأسرة والتربية
وأشارت إلى أن اهتمامات الجيل الحالي ومشكلاته تختلف عن الأجيال السابقة، موضحة: "أكتر القضايا اللي بيناقشها المسلسل ممكن نلخصها في مشاكل العيلة والتربية وتعامل الآباء مع الطفل، وده بيكون نتيجته تعامل الأبناء مع المجتمع بعد كده".
شهران من التدريب على التزلج من أجل الشخصية
وكشفت جيدا منصور عن استعدادها للشخصية، وقالت: "كان عندي شهرين علشان أتمرن على التزلج علشان الشخصية بتلعب Skating، لكن لولا الدور ما كنتش هحب أتعلمه، لكن مثلًا نفسي أعمل دور عازفة ساكسفون علشان أتعلمه".
وأكدت أنها تحرص على اختيار أعمالها بعناية، مضيفة: "بحاول أختار العمل اللي أمثل فيه، مش مجرد لغرض الانتشار".
جيدا منصور تتحدث عن تجربتها في ورش التمثيل للأطفال والمراهقين
وتحدثت عن تجربتها في تقديم ورش تمثيل للأطفال والمراهقين، وقالت: "أنا حاليًا بدي ورش للأطفال والمراهقين، والأصعب إنك تدي المعلومة لحد من لما تحاول أنت تاخد المعلومة".
كيف تغيرت أدوار الأطفال في الأعمال الفنية؟
وعن الفرق بين أدوار الأطفال في الأعمال الفنية حاليًا عن الوقت السابق، قالت: "حاليًا الأطفال بقوا عندهم وعي بالمشاعر اللي بيقدموها، فبيقدروا يمثلوا، زائد التوجيه اللي بقى موجود والورش المخصصة للأطفال، مع الإتاحة لأدوار أطفال فيها مساحات أكتر من كونه مجرد طفل في المشهد، زي علي البيلي في مسلسل (لام شمسية) اللي كان العمل بيدور حواليه".
كما أوضحت أن أكبر تحدٍ في تدريب الأطفال هو الفصل بين الشخصية وحياتهم، قائلة: "أصعب حاجة في تعليم التمثيل للأطفال والمراهقين إنهم بياخدوا كل حاجة بشكل شخصي.. فأكتر حاجة بحاول أعلمهالهم إنهم يفصلوا بين التمثيل وحياتهم الشخصية".
الشخصية التي كانت تتمنى جيدا منصور تقديمها
وكشفت جيدا منصور عن شخصية كانت تتمنى تقديمها، وقالت: "كان نفسي أعمل دور منة شلبي في فيلم (هي فوضى)، لأني شوفته وأنا صغيرة، وكان فيه مشاعر وبتمر بحاجات كتير، فحسيت إني عاوزة أمثل الحاجات دي".
جيدا منصور: ردود فعل الشارع أصدق من السوشيال ميديا
وأكدت أنها تعتبر ردود فعل الجمهور في الشارع هي المقياس الحقيقي للنجاح، وقالت: "ردود فعل الشارع بحسها أصدق من السوشيال ميديا، لأن الشخص اللي هياخد من وقته وهييجي يتكلم معايا في الواقع أصدق من إنه يكتب كومنت من ورا شاشة".
رسالة جيدا منصور إلى أولياء الأمور
ووجهت جيدا منصور رسالة إلى أولياء الأمور، مستوحاة من الرسائل التي يناقشها مسلسل «أندر إيدج»، وقالت: "اسمعوا لأولادكم وابنوا مساحة آمنة إنهم يقدروا يتكلموا، ومش معنى كده إنك هتوافق على أي حاجة هيقولوها، لكن اسمع وأديهم النصيحة، وهم في يوم هيفهموا ده".
ماذا قالت جيدا منصور عن أعمالها المقبلة؟
وفي ختام حديثها، كشفت أنها تمر بمرحلة جديدة في مشوارها الفني، وقالت: "الفترة دي نقلة معينة في مشواري، وفيه كذا مشروع قدامي، لكن مستنية أعرف ردود الأفعال على دوري في (أندر إيدج) لحد نهايته علشان أقرر".
قصة مسلسل "أندر إيدج" ومكان عرضه
ينتمي مسلسل "أندر إيدج"، الذي يُعرض عبْر منصة "شاهد mbc"، إلى الدراما الاجتماعية؛ حيث يسلّط الضوء على حياة خمس فتيات مراهقات في المرحلة الثانوية. ويتناول المسلسل التحديات والضغوط النفسية والاجتماعية التي تواجه الشباب في هذه المرحلة العمرية، إلى جانب قضايا الهوية، وتكوين الشخصية، والعلاقات الأسرية، والصداقة؛ فضلاً عن رصد تأثير منصات التواصل الاجتماعي والبيئة المحيطة على قراراتهم.
أبطال مسلسل "أندر إيدج"
المسلسل بطولة نخبة من الفنانين والوجوه الشابة، من بينهم: جيسيكا حسام الدين، عمرو وهبة، ريم المصري، جيدا منصور، جودي مسعود، أحمد فهيم، أحمد الرافعي، سماء إبراهيم، فرح يوسف، عبدالله أشرف، وآخرون. والعمل تأليف أمين جمال. وسيناريو وحوار مينا بباوي ومحمد السوري. وإخراج يحيى إسماعيل.
قد ترغبين في معرفة بعَد تصدُّر "أندر إيدج- تحت السن" للترند: أبرز المسلسلات العربية التي دارت أحداثها داخل المدارس
لمشاهدة أجمل صور المشاهير زوروا «إنستغرام سيدتي».
وللاطلاع على فيديوغراف المشاهير زوروا «تيك توك سيدتي».
ويمكنكم متابعة آخر أخبار النجوم عبر «تويتر» «سيدتي فن».
Google News 
