حققت الفنانة السورية سلاف فواخرجي، حلما تأخر كثيرا بالوقوف أمام النجم دريد لحام، وشاركت متابعيها مقطع فيديو لأول مشهد يجمعهما من كواليس تصوير مسلسل "شارع شيكاغو" المقرر عرضه بماراثون دراما رمضان 2020، وعلقت عليه برسالة طويلة ومؤثرة.
سلاف بدت مرتبكة بأول الفيديو وعلقت عبر حسابها بموقع إنستقرام قائلة: البداية دايما بتكون صعبة... وانا مع كل بداية بخاف... ومع كل بداية تصوير بحس اني لأول مرة بحياتي عم وقف قدام الكاميرا... بخاف وبرتعب ، ومابنام قبلها بيوم... لدرجة اني يمكن امرض احيانا... بس بعد شوي بتتلاشى كل المشاعر الاولى الصعبة ، وبغرق بالعشق... وبصير انا والكاميرا واحد ما معنا شريك تالت... مامنشوف الا بعض ، بنفهم ع بعض ، بنحس ببعض ، بنغازل بعض.
تابعت قائلة: واوقات ممكن نزعل من بعض ... ومنعيش الكاميرا وأنا ... حالة متعة ، دوران ... ودوائر دوائر مالها حدود ... ومع كل بداية تصوير كمان ، بحس انو يمكن تكون هي اخر مرة بوقف قدام الكاميرا ... ماحدا بيعرف... لهيك لازم اعطيها روحي ... قبل ماروح... البداية بتحمل نشوة والنهاية مسؤولية لازم كون قدها ...
وأضافت: ومبارح ، كانت بداية جديدة لعمل جديد "شارع شيكاغو" والاحاسيس اللي حكيت عنها هي هي ماتغيرت ومابتتغير من لما ابتديت ولحد هاللحظة ، وبدعي ربنا انها ماتتغير... لأنها بالأخير هي "أنا"... بس بدايتي مبارح كانت بحلم انتظرته كتير... اني وقف امام عملاق من عمالقة الفن السوري والعربي ، "دريد لحام" الممثل اللي بتفتخر سوريا انه منها...ونحنا كلنا منفتخر فيه... احباب واصحاب والتقينا كتير وتعلمت منه كتير ورحنا واجينا وسافرنا سوا وعملنا نشاطات سوا وتفاصيل اجتمعنا فيها سوا...
واختتمت رسالتها قائلة: بس كنت ناطرة انو تجمعني معه بيوم الكاميرا... اتأخرت بس وأخيرا صارت... وكان بدايتي بعملي الجديد بحلم قديم وتحقق ...
يذكر أن مسلسل "شارع شيكاغو" يضم نخبة من نجوم الدراما السورية منهم الفنان دريد لحام، وأمل عرفة، وعباس النوري، وشكران مرتجى، ونظلي الرواس، ومهيار خضور، ونادين سلامة، ونادين خوري، وهدى شعراوي، ومن إنتاج شركة قبنض للإنتاج الفني وتأليف وإخراج محمد عبدالعزيز.
وتدور أحداث المسلسل حول قصة فتاة دمشقية تهرب برفقة بطل شعبي لتواجه المجتمع والجهات التي تلاحقها في حقبة الستينيات حيث تلجأ لتياترو في شارع شيكاغو الذائع الصيت والذي كان يمثل وقتها الامتداد الحضاري والمعاصر للمجتمع الدمشقي، ينتهي الصراع بجريمة قتل غامضة تتكشف خيوطها في الوقت الحالي على يد محقق يعثر صدفة على ملف القضية فتتحول الحقبتين الزمنيتين مرآتين تعكسان قصص الصراع والحب والتضحية والجمال.
لمشاهدة أجمل صور المشاهير زوروا أنستغرام سيدتي
